जयमल कल्ला पच्चीसी

जयमल कल्ला पच्चीसी
    रणबंका राठौड़
--------------------------------
जयमल जोधो जोरगो, चावो गढ़ चितौड़।
अमर नाम कर आपरौ,रणबंका राठौड़।।1।।

कल्लो भैरव कालियो,हुवै न जिणसूं होड़।
कांधै काको कमधजो, रणबंको राठौड़।।2।।

जुद्ध में कटगी जांघड़ी,करुं मैं किण विद झोड़।
कल्ला सूं जयमल कहै,रणबंको राठौड़।।3।।

बेठो कांधै बापजी,जबरो करस्यां झोड़।
चारभुजा धर चालिया, रणबंका राठौड़।।4।।

काका भतीजा ऐकला, मारया तुर्क मरोड़।
जयमल कल्ला जोरगा,रणबंका राठौड़।।5।।

बैठ भुजा पर भैरवी, करै घनेरा कोड।
खप्पर भरिया कालका,रणबंका राठौड़।।6।।

आय विराजै अम्बिका,ठमकत भाला ठौड़।
बैठ भुजा पै भगवती,रणबंका राठौड़।।7।।

तक तक मारै तुरकड़ा,तड़ तड़ गरदन तोड़।
दड़बड़ रण में दौड़ता, रणबंका राठौड़।।8।।

खड़गां रण में खड़कती, ठमकत ठावी ठौड़।
भुजा विराजी भगवती, रणबंका राठौड़।।9।।

भुजा चार धर भगवती, ठावी बैठी ठौड़।
कल्ला जयमल कमधजा,रणबंका राठौड़।।10।।

डम डम डमरू डमकता, फड़ फड़ घुड़ला पोड़।
कांधे जयमल कमधजो, रणबंका राठौड़।।11।।

खड़ खड़ खांडा खड़कता,दड़बड़ घोड़ा दौड़।
कांधे चढ़ियो कमधजो, रणबंका राठौड़।।12।।

तड़ तड़ पड़ता तुरकड़ा, भड़ भड़ फूटत भोड।
मारै घणाय मुगलिया,रणबंका राठौड़।।13।।

थर थर छूटत धूजणी, फड़ फड़ गोला फोड़।
सर सर सर सरणावतो,रणबंका राठौड़।।14।।

फर फर मूंछां फरकती, जबरो बणियो जोड़।
जयमल कल्ला जोरगा,रणबंका राठौड़।।15।।

भळ भळ भालो भळकतो,तड़कत छाती तोड़।
मुगल घणाई मारिया,रणबंका राठौड़।।16।।

हिण हिण घुड़ला हिणकता,दमकत जाता दौड़।
दळता अरिदल दोवड़ा,रणबंका राठौड़।।17।।

ढम ढम बाजत ढोलड़ा, तुरही ताबड़ तोड़।
कबंध लड़ता ऐकला, रणबंका राठौड़।।18।।

मुगल मारया मोकळा,चढ़ियो रंग चितौड़।
जयमल कल्ला जोरगा,रणबंका राठौड़।।19।।

तोपां तोड़ी ठावकी, कर कर कल्ला कोड।
कांधै जयमल कमधजो,रणबंको राठौड़।।20।।

करियो अचम्भो अकबर,हुवै न इणरी होड़।
चतुर्भुज बणै चोवटा, रणबंका राठौड़।।21।।

चलै कटारी चौगुनी,तड़ तड़ ताबड़तोड़।
धड़ तो लड़ता धाड़वी,रणबंका राठौड़।।22।।

परतख खप्पर पीवती, रणचण्डी रणछोड़।
मुंड माला गल मोहनी,रणबंका राठौड़।।23।।

आन बान अर शान में, हुवै न इणरी होड़।
रणभूमि में लड़ मरिया,रणबंका राठौड़।।24।।

रंग रुड़ा हा राजवी,कहै अजय कर जोड़।
अमर इला पर आपरी,रणबंका राठौड़।।25।।

✍रावला करमावास.........RJ 22......'🙏🙏🙏🙏🙏🙏🙏