हाईफा रौ युद्ध
-: हाईफा दिवस :-
हाईफा रौ युद्ध :- २३ सितंबर १९१८
म्हारी आ नवीं कविता :- तोपा नै तलवारां सूं जीत्या हा ।
( हाईफा सहर जो इण बगत इजराइल में है उण सहर पर कबजौ तुर्की रौ हो अर अंग्रेजी हकुमत कई बार जीतण री कोसीस करी पण पार पड़ी कोनी क्यूंक हिफाजत में तुर्की सागै जर्मनी अर आस्ट्रेया री फोजा तोपा अर बंदूका सूं लेस तैनात ही पण अंग्रेज हाईफा नै ऐन-केन प्रकारेण कब्जावणौ चावा हा इणी योजना रे कारण अंग्रेज ऐलकार जोधपुर रियासत आय-परा सर प्रताप सूं मिळया अर आ सलाह दी क आप सैना रा हथियार बदलो क्यूंक अंग्रेजा री नजर मारवाड़ रा वीरां री वीरता पर ही इण कारण मदद वास्ते सैना में बदलाव री बात पर जोर दियो )
(सर-प्रताप सूं अंग्रेजी अफसर रो सवाल जबाब )
इण बेळयां करो बदलाव थै सैना में,
ऐ भाला तलवारा धिकै नहीं ।
दुस्मण री तोपां अर बंदूका सामीं,
थांरी आ सैना टिकै नहीं ।
ल्यावौ थांरा सस्त्र पाती,
अर लाव-लसकर भी ल्यावौ थाकां ।
म्हैं उतारां सैरां ने सामीं,
तो जीतला ऐ रणबंका म्हाकां ।
म्हे कोनी आया लड़बा ताणी,
कोई समझोतों करणौ है म्हाने थांसू ।
यूं तो म्हैं मूलक जीत्यो पण,
अबतक जीतीज्यो कोनी हाईफो म्हां सूं ।
मदद करो थै आ म्हाकी,
म्हैं थारै रगत रो मोल चुकावालां ।
जोधाणे ने देस्या धन दूणौ,
थारै आडे बगत काम भी आवालां ।
( १९१८ में दौना पक्षा री हताई हुई अर मारवाड़ री फौज नै भैजण री बात तय हुई )
सर प्रताप राखी सरत ऐक,
साधन थांका घोड़ा सस्त्र सैनिक म्हांका ।
ले जावण री करो तयारी,
जबर जोध जीत ल्यावेला हाईफा थांका ।
हर ऐक टाळवां सैनिक हो,
जिण री गिणती लसकर माहीं ठावां में ।
बै तिलक कढा ले सस्त्र,
घोड़्या रे सागै जा बैठ्या अंगरेजा री नावां में ।
सात समदर पार करण ने बीर हुया,
बै काले ताणी खेला हा आं गावां में ।
मरणा ने मंगळ जाणै,
उण री गिणती हुया करे जग चावां में ।
पुगी फोज अंग्रेज धरा पर,
सामान धरया निचे अर बांध्या घोड़ा ने खूटे।
मारवाड़ मे गरम्या रा घाण,
अठै थर-थर धूजणी घोड़ा धणी दोन्या ने छुटे ।
( इंग्लैंड में ठंड रै कारण गूदड़ा में दुबक्योड़ा सैनिका नै अर ठंड सूं भैळा हुयोड़ा घोड़ा ने देख अंग्रेजी आला अफसर निरास हुया क ऐ कांई युद्ध में पार पड़ेला ! क्योंक हाईफा में बड़ण रौ संकडौ दर्रौ सामी तोप तणयोड़ी अर पाछलै पसवाड़ै भाखर ऊभी भींत जयूं खड़ौ अर दूसरो कोई रस्तौ कोनी, तौ भारत सूं गयोड़ा रसाला में मीन-मेख काढण लागा क्यूंक अंग्रेज ऐक बार और आपरी नाक कटण रा डर सूं अंग्रेज तुर्की री सैना सूं हाईफा री लड़ाई नै टाळण री जुगत में लाग्या )
क्यो घाल्या घोड़ा ने फोड़ा,
घुड़दौड़ तो इंग्लिश घोड़ा री होवै तेज ।
पतळा है आंरा ऐ घोड़ा,
कांई करस्या आंने हाइफा भेज ?
( उप सैनापति अमान सिह जी सूं सवाल-जबाब में घोड़ा रो बखाण अर अंग्रेजा री बात रो विरोध )
( बै थाकळ घोड़ा री खासयित बताई )
आगे-पाछै, दायां-बायां,
चालो आ बात, म्हारा घोड़ा नै नहीं है केणा री ।
आ नस्ल मारवाड़ी असल,
खुद दौड़ै दड़बड़ै जरूरत कोनी ऐडी देणा री ।
ऐ दुस्मण पर खुद लपकै,
ऐ घोड़ा सक्ल पिछाणै, दुस्मण अर सेणा री ।
ऐ असवारां रौ मन पढै,अर आगै बढै,
आं घोड़ा री आदत, मोत नै टापां हेटै देणा री ।
( तलवारां अर भाला पर अंग्रेज अफसर मोसा बोल्या )
बै खळकावे तोपां सूं गोळा,
अर थै लाय्या हो खिल्ला पाती ।
थै पाछा बावड़ल्यो,
हाइफो हाथ ना आवै, मोत आवेली थांकै पांती ।
आ बात सूणी, मना गुणी,
तो अमान रै आंख्यां आयौ रगत उतर ।
म्हैं जावां नहीं जींवता,
म्हानै पाछा भेजण रौ, थैं सूणौ पड़ूतर ।
म्हैं आया बुलायोड़ा लड़बा ताणी,
कोई जरूत कोनी कूड़ा बैणा री ।
अंग्रेजी अफसर पाछपग्या खिसक्या,
देखी रंगत राठौड़ी नेणा री ।
बिन सोच्या समझ्या म्हानै थै लाया क्यों,
ई आवण में फिटा म्है पड़स्या ।
पग पाछां देणी रातां, ना जण्या म्हानै माता,
लस्कर ने आगे म्हैं खड़स्यां ।
वीरगति हुवै म्हारी भली गति, इण बिद,
बंदूका तोपां आगे म्हैं अड़स्या ।
थानै मरबा को डर लागै,
थै मना लड़ो, तुर्की सूं लड़ाई म्हैं लड़स्या ।
मात भवानी सिंवर परा,
तिलक्या सस्त्र पछै, कसूमल किदो धारण ।
पाछा जावण रा दौ ही रस्ता,
मरा क मारा, तीजौ नहीं है कोई कारण ।
म्हे नहीं आया करबा देसाटण,
म्हे आया हां बैरया नै मारण ।
भूल भरोसै बावड़ देखां,
तो चुंट्या चुंटै चाम, म्हांका चारण ।
पांख पसार आसिस आप्यो मां,
जद निकल्या हा, केसरिया पेंचो रख माथे ।
पाछो मुड़ देखण रो लागे पाप,
म्हे लड़स्या, है मात भवानी म्हारे साथै ।
म्हैं भी जाणां हां,
ऐ हाईफा रा रस्ता है बाकां है ।
पण पाछा जावण वाळा,
ऐ बोल कूड़ा थाकां है ।
मत डरपौ थैं,
म्हारै हाथां टुटे टैंका रा टांका है ।
सवा हाथ चौड़ी छाती,
काळजा सवा सेर का म्हांका है ।
थे म्हाकौ इतिहास पढो,
लिख्योड़ा उजळ आखर उजळ धोरां पर ।
आ सुण अंगरेजा जिद छोडी,
आ दबक असर करगी अफसर गौरां पर ।
( आखिर में युद्ध रौ निर्णय हुयौ, त्यारां होवण लागी इण युद्ध में मैसूर, जोधपुर और हैदराबाद रा टाळवां सैनिक भी हा पण इण सैना री अगवाणी सेनापति दलपत सिंघ अर स-सेनापति अमान सिंघ जोधपुर रसालों करी अर ऐ दोन्यूं वीर मारवाड़ रै पाली जिला रा हा, फौजां हाईफा कानी रवाना हुई आ संसर में घुडसवारां री आखिरी लड़ाई ही अर आखिरी जीत ही )
घोड़ा संवारियां,
सूर सज्या है आपै थापै ।
हिणहिणा घोड़ा,
असवारा ने ऊभा भांपै ।
जोध जवान जीतण जोग,
जगदम्बै जापै ।
फिरै-गिरै अंग्रेजी अफसर,
वीरां री छाती नापै ।
घोड़ै चढ चाल्या तो,
टापां सूं अंबर कांपै ।
बिजळ री गत घोड़ा,
हाइफा रो रस्तो नापै ।
अंग्रेजां ने होग्यौ सक,
ऐ चढगी फोजां उल्टे पासा ।
पण दलपत अमान ने,
भुजबळ पर ही पूरी आसा ।
तोफानी सरणाटो ऊठै,
दोड़त बोलें घोड़ा री नासां ।
दड़बड़यां घोड़ा री टापां,
तो धूळ चढी ही आकासा ।
हाईफा रै नैड़ा पूग्या,
तो अंग्रेज़ी अफसर हंसतौ हौ ।
नैणा रगत उतर आयौ,
सस्त्रा री मूंठा, मूठ्ठी सूर कस्तौ हौ ।
द्ररा रै सामी तोप खड़ी,
घूसण रौ संकड़ौ रस्तौ हौ ।
बाकी फौज खड़ी ही पाछै,
आगै मारवाड़ रौ दस्तौ हौ ।
रण भूमि में रणखेत हुवां,
म्हानै मोत मिठी आ लागै है ।
माँ री जयकर करी, हूंकार भरी,
ऐ मोत वरण करण में आगै है ।
( सैना री आधी टुकड़ी पाछै सूं भाखर पर चढी )
चढ्या सपाट परबत री पूठा,
दुस्मण अठा सूं गौळा दागै है ।
ऐ पाछा सूं जाय दबोच्या बानै,
क्यूंक दुस्मण रा मून्डा आगै है ।
चकबंगा होग्या देख मोत,
ऐ वीर यमराज ज्यूं लागै है ।
तोपा रा मूण्डा फेर दिया,
अब गोला उल्टा-सुल्टा दागै है ।
दुस्मण गोळ्यां री बौछाड़ करी,
गोळ्या सामी छाती लागै है ।
मींच आंख्यां दुस्मण री छाती चढग्या,
देखो, यूं जगदम्बा जागै है ।
भाला तलवारां यूं पळकी,
मोत दुस्मण नै नैड़ी लागै है ।
पटक पछाड़्या तोपा सूं निचै,
देखा, अब कुण गोळा दागै है ।
अणचीत री देख मौत नै,
आ डरती तुर्की सैना भागै है।
मिनखां रै बात नहीं बसकी,
आरैं तो मात भवानी सागै है ।
तोपा रे सामी भाला तरवारा,
ताकत सूं खणकी ही ।
जोध जवना रे हिवड़ै,
हूंस उठ्योड़ी रण की ही ।
तोपा रा तोपची हुया दिसा-हीण,
क्यूंक चोटा भी मण-मण की ही ।
हथियार फैंक समरपण किदौ,
मान्यौ, फौज मारवाड़ री टणकी ही ।
छाती पर सूरवीर गोळ्या झैली,
जीत ल्या पटकी अंग्रेजा रै खाता में ।
हाईफा रो हिरो दलपत सहिद हुयो,
अब कमान अमान रै हाथां में ।
अब दुस्मण तौ हार मानली,
पड़्या जर्मन तुर्की सैनिक लाता में ।
आ लड़ाई ना लड़्ता, धोखौ रहतो,
ओ चक्कर चढगौ अंग्रेजा रै माथा में ।
ऐ रण-बांकुरा नही आता तो,
ना आतौ हाईफो म्हांकै हाथां में
अंग्रेज देख वीरता हुया बावळा,
अर भर लियौ अमान नै बाथां में ।
आज होवै आजाद हाईफा,
गुलामी रा बरस चार सौ बित्या हा ।
लांठा लांघ्या नदी नाळा,
अर दळ-दळ ने भी चिंत्या हा ।
पार पायगा परबत बै,
जो सिधी ऊभी भींतयां हा ।
अणहोणी नै करदी होणी,
तोंपा नै तलवारां सूं जीत्या हा ।
हाँ तोपा नै, तलवारां सूं जीत्या हा ।
.*****
इण युद्ध नै अंग्रेज आज भी ऐक अणहोणी ही माने है क्यूंक हाईफा में कई बार हार रा जख्म अंग्रेजा रै आज-तक दर्द करे है ।
हाईफा में घुसणौ अर तोप गोळा, बंदूका रे आगे तलवारां भाला सूं दौ तीन घड़ी में मात ऐक अजूबे सू कम कोनी ही, इण कारण अंग्रेज सरकार जोधपुर रियासत नै कौल मुजब धन दियो पण सैनिका नै भी ऐक बड़ी रकम बतोर ईनाम सर-प्रताप नै सौंपी ।
पण सर-प्रताप री निजर आगला बदलता बगत में पढाई री महत्ता पर ही, इण कारण व्है ई रकम रौ सद-ऊपयोग करण रौ मानस बणायौ आवण वाळी पिढयां रै सिक्षा खातर ऐक बड़ी स्कूल बणावणौ चावता हा ।
जद ओ प्रस्ताव सर-प्रताप रसाला रै सैनिका सामी रख्यौ क इण रकम सूं ऐक बड़ी स्कूल बणावां तो आप लोगां रो कांई विचार है ? इण बात रौ सैना सर-प्रताप रौ विरोध करयौ सर-प्रताप समझावण री खूब कोसीस करी पण रसाला रा सैनिक ताव में आयगा और सर-प्रताप पर पथराव कर दियो तो रियासत रा बडा-बडेरा बीच-बचाव सूं सांति करवाई पण रसाला री फोरी हरकत सूं नाराज सर-प्रताप चौपासनी में बड़ी स्कूल बणावण पर अड़्योड़ा हा, अर बणाई ।
आज सर-प्रताप री आवण वाळा बगत पर पढाई री जरूरत री नजर आ चौपासनी स्कूल ना जाणै मारवाड़ रा कितरा हीरा तरास परा मां भारती नै सुमप्यां हा अर बै मारवाड़ रा सपूत देस री हर क्षैत्र में सेवा करी अर करे है ।
पछमी राजस्थान अर मारवाड़ री आ संस्था हाईफा में बलिदान दियोड़ा वीरां लोही अर लड़ाई में भाग लियोड़ा वीर सैनिका रै पसेवा री कमाई आ चौपासनी स्कूल री इमारत आज भी सर-प्रताप री मूर्ति रै सागै मस्तक ऊंचौ करयां जोधपुर में आथूणै पसवाड़ै आज भी खड़ी है ।
आवौ आज २३ सितंबर है इण हाईफा दिवस माथै काळजा सूं आज आवौ उण वीर सपूता नै नमन करां ।
महेन्द्र सिंह भेरून्दा
